ಕನ್ನಡಿ.
ಇಣುಕಿ ನೋಡಿದವನ
ಬಡತನ ಸಿರಿತನ ಕೋಪ ತಾಪ ತಾಳ್ಮೆ
ಮರೆಮಾಚದೇಕೋ ಅಹಂಕಾರವನೆ
ಆ ಮಾಯಕನ್ನಡಿ?
ಇದ್ದದ್ದನ್ನು ಇದ್ದಂತೆ
ಕಂಡದ್ದನ್ನು ಕಂಡಂತೆ
ಪ್ರತಿಬಿಂಬಿಸಿತೇಕೋ ಅಂತರಂಗವನೆ
ಆ ಸೋಜಿಗದ ಕನ್ನಡಿ?
ಯೌವನದ ಮೈಕಾಂತಿ
ಮತ್ತೆ ನೋಡುವ ಆಸೆ ತಣಿಸಿ
ಸುಕ್ಕುಗಟ್ಟಿದ ಬಾಹ್ಯದಲಿ ಸಾರಿತೇಕೋ ಅಂತ್ಯವನೆ
ಆ ನಿಷ್ಕರುಣ ಕನ್ನಡಿ?
ಹಿಂಬದಿಯಲಿ ಈಕ್ಷಿಸಿದವನ
ನ್ಯೂನತೆಯನೆ ಪರಿಗಣಿಸಿ
ಸಾರ್ಥಕ ಜೀವನದ ಕೈಪಿಡಿ ಆಯಿತೇಕೋ
ಆ ಅರ್ಥಗರ್ಭಿತ ಕನ್ನಡಿ?
ಕಣ್ಗಳಲಿ ಕಾಡಿಗೆಯನಿಡುವವನ
ಕಣ್ಣಲ್ಲಿ ಕಣ್ಣಿಟ್ಟು
ಪ್ರಶ್ನಿಸಿತೇಕೋ ಅಂತರಾಳದ ತಳಹದಿಯನೆ
ಆ ಕುರುಡು ಕನ್ನಡಿ?
ಜಗದ ಹಿತ ಅಹಿತವನೆಣಿಸದೆ
ಮೂಕ ಧ್ವನಿಯಲಿ
ನುಡಿಯಿತೇಕೋ ಸತ್ಯವನೆ
ಆ ನಿಷ್ಠುರ ಕನ್ನಡಿ?
ಕೋಪದಲಿ ನೀ ಒಡೆದ
ಕನ್ನಡಿ ಚೂರಾದರೂ
ಸತ್ಯ ಚೂರಾಗದೇಕೋ ಮನುಜ?
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ